Riddle 26

Ed. Murray McGillivray. Online Corpus of Old English Poetry (OCOEP). Completed edition. This file last updated 23/5/08.

Mec feonda sum     feore besnyþede,
woruldstrenga binom.     Wætte siþþan,
dyfde on wætre,     dyde eft þonan,
sette on sunnan,     þær ic swiþe beleas

5

herum þam þe ic hæfde.     Heard mec siþþan
snað seaxses ecg, †     sindrum begrunden;†
fingras feoldan,     ond mec fugles wyn
geondsprengde speddropum†     spyrede geneahhe
ofer brunne brerd.     Beamtelge swealg,

10

streames dæle,     stop eft on mec,
siþade sweartlast.     Mec siþþan wrah
hæleð hleobordum,     hyþe† beþenede,
gierede mec mid golde;     forþon me gliwedon
wrætlic weorc smiþa,     wire bifongen.

15

Nu þa gereno     ond se reada telg
ond þa wuldorgesteald     wide mærað†
dryhtfolca helm,     nales dol wite.*
Gif min bearn wera     brucan willað,
hy beoð þy gesundran     ond þy sigefæstran,

20

heortum þy hwætran     ond þy hygebliþran,
ferþe þy frodran,     habbaþ freonda þy ma,
swæsra ond gesibbra,     soþra ond godra,
tilra ond getreowra,     þa hyra tyr ond ead
estum ycað     ond hy arstafum,

25

lissum bilecgað     ond hi lufan fæþmum
fæste clyppað.     Frige hwæt ic hatte,
niþum to nytte.     Nama min is mære,
hæleþum gifre     ond halig sylf.