Riddle 2

Ed. Murray McGillivray. Online Corpus of Old English Poetry (OCOEP). Completed edition. This file last updated 12/05/08.

Hwilum ic gewite,     swa ne wenaþ men,
under yþa geþræc     eorþan secan,
garsecges grund.     Gifen biþ gewreged,
fam gewealcen; †

5

hwælmere hlimmeð,     hlude grimmeð,
streamas staþu beatað,     stundum weorpaþ
on stealc hleoþa     stane ond sonde,
ware ond wæge *,     þonne ic winnende,
holmmægne biþeaht,     hrusan styrge,

10

side sægrundas.     Sundhelme ne mæg
losian ær mec læte     se þe min latteow bið
on siþa gehwam.     Saga, þoncol mon,
hwa mec bregde     of brimes fæþmum,
þonne streamas eft     stille weorþað,

15

yþa geþwære,     þe mec ær wrugon.