866. Her feng Æþered Æþelbryhtes broþur to Wesseaxna rice; and þy ilcan geare cuom micel here on Angelcynnes lond, and wintersetl namon on Eastenglum, and þær gehorsude wurdon, and hie him friþ wiþ namon.
867. Her for se here of Eastenglum ofer Humbre muþan to Eoforwicceastre on Norþhymbre, and þær wæs micel ungeþuærnes þære þeode betweox him selfum, and hie hæfdun hiera cyning aworpenne Osbryht, and ungecyndne cyning underfengon Ællan; and hie late on geare to þam gecirdon þæt hie wiþ þone here winnende wærun, and hie þeah micle fierd gegadrodon, and þone here sohton æt Eoforwicceastre, and on þa ceastre bræcon, and hie sume inne wurdon, and þær was ungemetlic wæl geslægen Norþanhymbra, sume binnan, sume butan; and þa cyningas begen ofslægene, and sio laf wiþ þone here friþ nam; and þy ilcan geare gefor Ealchstan Biscep, and he hæfde þæt bisceprice .l. wintra æt Scireburnan, and his lic liþ þær on tune.
868. Her for se ilca here innan Mierce to Snotengaham, and þær wintersetl namon; and Burgræd Miercna Cyning and his wiotan bædon Æþered Westseaxna Cyning and Ælfred his broþur þæt hie him gefultumadon, þæt hie wiþ þone here gefuhton; and þa ferdon hie mid Wesseaxna fierde innan Mierce oþ Snotengaham, and þone here þær metton on þam geweorce, and þær nan hefelic gefeoht ne wearþ, and Mierce friþ namon wiþ þone here.
869. Her for se here eft to Eoforwicceastre, and þær sæt .i. gear.
870. Her rad se here ofer Mierce innan Eastengle and wintersetl namon æt Þeodforda, and þy wintre Eadmund Cyning him wiþ feaht, and þa Deniscan sige namon, and þone cyning ofslogon, and þæt lond all geeodon. And þy geare gefor Ceolnoþ Ærcebiscop, and Æþered Wiltunscire Biscop wearþ gecoren to Ærcebiscpe to Cantuareberi.
871. Her cuom se here to Readingum on Westseaxe, and þæs ymb .iii. niht ridon .ii. eorlas up. Þa gemette hie Æþelwulf Aldorman on Englafelda, and him þær wiþ gefeaht and sige nam; þæs ymb .iiii. niht Æþered Cyning and Ælfred his broþur þær micle fierd to Readingum gelæddon, and wiþ þone here gefuhton, and þær wæs micel wæl geslægen on gehwæþre hond, and Æþelwulf Aldormon wearþ ofslægen, and þa Deniscan ahton wælstowe gewald; and þæs ymb .iiii. niht gefeaht Æþered Cyning and Ælfred his broþur wiþ alne þone here on Æscesdune, and hie wærun on twæm gefylcum, on oþrum wæs Bachsecg and Halfdene þa hæþnan cyningas, and on oþrum wæron þa eorlas; and þa gefeaht se cyning Æþered wiþ þara cyninga getruman, and þær wearþ se cyning Bagsecg ofslægen; and Ælfred his broþur wiþ þara eorla getruman, and þær wearþ Sidroc Eorl ofslægen se Alda, and Sidroc Eorl se Gioncga, and Osbearn Eorl, and Fræna Eorl, and Hareld Eorl, and þa hergas begen gefliemde, and fela þusenda ofslægenra, and onfeohtende wæron oþ niht. And þæs ymb .xiiii. niht gefeaht Æþered Cyning and Ælfred his broður wiþ þone here æt Basengum, and þær þa Deniscan sige namon; and þæs ymb .ii. monaþ gefeaht Æþered Cyning and Ælfred his broþur wiþ þone here æt Meretune, and hie wærun on tuæm gefylcium, and hie butu gefliemdon, and longe on dæg sige ahton, and þær wearþ micel wælsliht on gehwæþere hond, and þa Deniscan ahton wælstowe gewald; and þær wearþ Heahmund Biscep ofslægen, and fela godra monna; and æfter þissum gefeohte cuom micel sumorlida; and þæs ofer Eastron gefor Æþered Cyning, and he ricsode .v. gear, and his lic liþ æt Winburnan. Þa feng Ælfred Æþelwulfing his broþur to Wesseaxna rice; and þæs ymb anne monaþ gefeaht Ælfred Cyning wiþ alne þone here lytle werede æt Wiltune, and hine longe on dæg gefliemde, and þa Deniscan ahton wælstowe gewald; and þæs geares wurdon .viiii. folcgefeoht gefohten wiþ þone here on þy cynerice be suþan Temese, and butan þam þe him Ælfred þæs cyninges broþur, and anlipig aldormon, and cyninges þegnas oft rade onridon þe mon na ne rimde, and þæs geares wærun ofslægene .viiii. eorlas and an cyning; and þy geare namon Westseaxe friþ wiþ þone here.
872. Her for se here to Lundenbyrig from Readingum, and þær wintersetl nam, and þa namon Mierce friþ wiþ þone here.
873. Her for se here on Norþhymbre, and he nam wintersetl on Lindesse æt Turecesiege, and þa namon Mierce friþ wiþ þone here.
874. Her for se here from Lindesse to Hreopedune, and þær wintersetl nam, and þone cyning Burgræd ofer sæ adræfdon ymb .xxii. wintra þæs þe he rice hæfde, and þæt lond all geeodon; and he for to Rome and þær gesæt and his lic liþ on Sancta Marian Ciricean on Angelcynnes scole; and þy ilcan geare hie sealdon anum unwisum cyninges þegne Miercna rice to haldanne, and he him aþas swor and gislas salde, þæt he him gearo wære swa hwelce dæge swa hie hit habban wolden, and he gearo wære mid him selfum and on allum þam þe him læstan woldon to þæs heres þearfe.
875. Her for se here from Hreopedune, and Healfdene for mid sumum þam here on Norþhymbre. and nam wintersetl be Tinan þære ea, and se here þæt lond geeode. and oft hergade on Peohtas, and on Stræcled Walas; and for Godrum and Oscytel and Anwynd, þa .iii. cyningas, of Hreopedune to Grantebrycge mid micle here, and sæton þær an gear; and þy sumera for Ælfred Cyning ut on sæ mid sciphere, and gefeaht wiþ .vii. sciphlæstas, and hiera an gefeng. and þa oþru gefliemde.
876. Her hiene bestæl se here into Werham Wesseaxna fierde, and wiþ þone here se cyning friþ nam, and him þa aþas sworon on þam halgan beage, þe hie ær nanre þeode noldon, þæt hie hrædlice of his rice foren; and hie þa, under þam, hie nihtes bestælon þære fierde se gehorsoda here into Escanceaster; and þy geare Healfdene Norþanhymbra lond gedælde, and ergende wæron and hiera tilgende.
877. Her cuom se here into Escanceastre from Werham, and se sciphere sigelede west ymbutan, and þa mette hie micel yst on sæ, and þær forwearþ .cxx. scipa æt Swanawic; and se cyning Ælfred æfter þam gehorsudan here mid fierde rad oþ Exanceaster and hie hindan ofridan ne meahte ær hie on þam fæstene wæron, þær him mon to ne meahte; and hie him þær foregislas saldon. swa fela swa he habban wolde, and micle aþas sworon, and þa godne friþ heoldon; and þa on hærfæste gefor se here on Miercna lond, and hit gedældon sum, and sum Ceolwulfe saldon.
878. Her hiene bestæl se here on midne winter ofer tuelftan niht to Cippanhamme, and geridon Wesseaxna lond and gesæton micel þæs folces and ofer sæ adræfdon, and þæs oþres þone mæstan dæl hie geridon, and him to gecirdon buton þam cyninge Ælfrede. and he lytle werede unieþelice æfter wudum for, and on morfæstenum; and þæs ilcan wintra wæs Inwæres broþur and Healfdenes on Westseaxum on Defenascire mid .xxiii. scipum, and hiene mon þær ofslog, and .dccc. monna mid him, and .xl. monna his heres; and þæs on Eastron worhte Ælfred cyning lytle werede geweorc æt Æþelinga eigge, and of þam geweorce was winnende wiþ þone here, and Sumursætna se dæl, se þær niehst wæs. Þa on þære seofoðan wiecan ofer Eastron he gerad to Ecgbryhtes stane be eastan Sealwyda, and him to com mon þær ongen Sumorsæte alle, and Wilsætan, and Hamtunscir se dæl, se hiere behinon sæ was, and his gefægene wærun; and he for ymb ane niht of þam wicum to Iglea, and þæs ymb ane to Eþandune, and þær gefeaht wiþ alne þone here, and hiene gefliemde, and him æfter rad oþ þæt geweorc, and þær sæt .xiiii. niht; and þa salde se here him foregislas and micle aþas, þæt hie of his rice uuoldon, and him eac geheton þæt hiera kyning fulwihte onfon wolde, and hie þæt gelæston swa; and þæs ymb .iii. wiecan com se cyning to him Godrum þritiga sum þara monna þe in þam here weorþuste wæron æt Alre, and þæt is wiþ Æþelingga eige; and his se cyning þær onfeng æt fulwihte, and his crismlising was æt Weþmor, and he was .xii. niht mid þam cyninge, and he hine miclum and his geferan mid feo weorðude.