Metrical Charm 4: To Stop a Stabbing Pain ("For a Sudden Stitch")

Ed. Murray McGillivray. Online Corpus of Old English Poetry (OCOEP). Edition in progress. This file last updated 12/12/07.

Wið færstice feferfuige, and seo reade netele ðe þurh ærn inwyxð, and wegbrade; wyll in buteran.

Hlude wæran hy, la, hlude,     ða hy ofer þone hlæw ridan,
wæran anmode,     ða hy ofer land ridan.
Scyld ðu ðe nu, þu ðysne nið     genesan mote.
Ut, lytel spere,     gif her inne sie.
5 (7)
Stod under linde,     under leohtum scylde,
þær ða mihtigan wif     hyra mægen beræddon
and hy gyllende     garas sændan.
Ic him oðerne     eft wille sændan,
fleogende flane     forane togeanes.
10 (12)
Ut, lytel spere,     gif hit her inne sy.
Sæt smið,     sloh seax lytel,
wæpen iserna,     wundrum swiðe.
Ut, lytel spere,     gif her inne sy.
Syx smiðas sætan,     wælspera worhtan.
15 (17)
Ut, lytel spere,     næs in, spere.
Gif her inne sy     isenes dæl,
hægtessan geweorc,     hit sceal gemyltan.
Gif ðu wære on fell scoten     oððe wære on flæsc scoten
oððe wære on ban scoten     oððe wære on blod scoten
20 (22)
oððe wære on lið scoten,     næfre ne sy ðin lif atæsed;
gif hit wære esa gescot     oððe hit wære ylfa gescot
oððe hit wære hægtessan gescot,     nu ic wille ðin helpan.
Þis ðe to bote esa gescotes,     ðis ðe to bote ylfa gescotes,
ðis ðe to bote hægtessan gescotes;     ic ðin wille helpan.
25 (27)
Fleoh þær flan     on fyrgenheafde.
Hal westu,     helpe ðin drihten.

Nim þonne þæt seax, ado on wætan.